ஈழத்தின் கற்பகத்தருவும் தாயக உற்பத்தியும்நம் பாரம்பரியத்தின் இனிய அடையாளம்
யோ. சாந்தி. பருத்தித்துறை.
இன்று நம் உணவுப் பழக்கவழக்கங்கள் மாறிவிட்ட சூழலில், பாரம்பரிய உணவுகளும் அவற்றின் தயாரிப்பு முறைகளும் மெல்ல மறைந்து வருகின்றன. ஒரு காலத்தில் ஆரோக்கியமான கிராமியக்கைத் தொழிலாகத் திகழ்ந்த பனங்கட்டி (கருப்பட்டி) உற்பத்தி, இன்று அரிதாகிவிட்டதைக் காண்பது வேதனைக்குரியது. நமது பாட்டன் பாட்டிகள் எவ்விதக் கலப்படமுமின்றித் தயாரித்து வழங்கிய அந்தச் சிறந்த பனங்கட்டியை மீட்டெடுக்க வேண்டியது காலத்தின் கட்டாயமாகும். இலங்கையின் வடக்கு மற்றும் கிழக்கு மாகாணங்களில் பெருமளவு காணப்படும் பனை மரங்கள், அவற்றின் பயன் கருதி ‘கற்பகத்தரு’ எனச் சிறப்பித்துச் சொல்லப்படுகின்றன. எமது தாயகத்தின் இந்த இயற்கை வளங்களை முறையாகப் பயன்படுத்தி, பாரம்பரிய தயாரிப்புகளுக்குப் புத்துயிர் வழங்க வேண்டியது எமது கடமையாகும். முதியவர்களின் அனுபவ அறிவைப் பெற்று, நவீன காலத்திற்கு ஏற்ப இவற்றை மேம்படுத்துவதன் மூலம் எமது பொருளாதாரத்தை நாம் வலுப்படுத்த முடியும்.
எமது அண்டை நாடன தென்னிந்தியாவின் தூத்துக்குடி மாவட்டம், திருச்செந்தூர் வட்டத்தில் உள்ள உடன்குடி பகுதி, கருப்பட்டி தயாரிப்பிற்கு உலகப் புகழ்பெற்றது. இங்கு தயாரிக்கப்படும் கருப்பட்டி அதன் தரம் மற்றும் சுவை காரணமாக புவிசார் குறியீடு (புஐ வுயப) பெற்றுள்ளது. இது தமிழர் பாரம்பரியத்தின் பெருமையை உலகளவில் பறைசாற்றுகிறது.
உடன்குடி கருப்பட்டியின் மகத்துவமே அதன் தூய்மைதான். பனை மரத்திலிருந்து இறக்கப்படும் பதநீரை, எவ்வித ரசாயனங்களும் சேர்க்காமல், பாரம்பரிய முறைப்படி காய்ச்சி இது தயாரிக்கப்படுகிறது. குறிப்பாகச் சுக்கு, மிளகு, திப்பிலி போன்ற மருத்துவ குணமுள்ள பொருட்கள் சேர்த்துத் தயாரிக்கப்படும் “சில்லுக் கருப்பட்டி” மிகவும் பிரபலமானது.
ஆரோக்கிய நன்மைகள்
வெள்ளைச் சர்க்கரைக்கு மாற்றாக விளங்கும் இந்த இயற்கைச் சுவையூட்டியில் எண்ணற்ற நன்மைகள் ஒளிந்துள்ளன:
- சத்துக்கள்: இதில் இரும்புச்சத்து, கால்சியம் மற்றும் தாதுக்கள் நிறைந்துள்ளன.
- மருத்துவ குணம்: சளி மற்றும் இருமலுக்கு இது ஒரு சிறந்த இயற்கை மருந்தாகச் செயல்படுகிறது.
- இயற்கை முறை: எவ்விதக் கலப்படமும் இல்லாததால் உடல் ஆரோக்கியத்திற்கு மிகுந்த பாதுகாப்பு அளிக்கிறது.
நமது முன்னோர்களிடம் இருக்கும் இந்த உன்னதக் கலையை இன்றைய தலைமுறைக்கு முறையாகக் கடத்தத் தவறிவிட்டோம். ஈழத்தின் வடக்கு கிழக்கின் ‘கற்பகத்தரு’ பனைசார் உற்பத்திகளை நாம் ஊக்குவிக்க வேண்டும்.
